DINU ÇIM DE Bİ Vİ KERGANE

Désim dinu çım de bi vi kergane

Adır est werte, verday pé bilgane
Na undére, qa xuya dinuna khane
Çewres serre de réyé, kerd vérane

Xırave cı ré amé, çeki vorde çarnay

Peyécoy kerdi kom, eve ho berdi day

Deşti kerdi ve ho verra, péra gıréday

Ho dara dest, sanay sare kılayé şay

Caverday amey; koy, warey, tholdey
Dısmenuné  Désımi ré nay ro vıley

Bi ra u olaği; koy, géris u cerdey

Goneweri resti ve her ca u warey

Her het ro amey, ve tabur u elay

Xayini ver, ra u réçi ro cı mısnay

Gureti, caé ke nécériyéne qolay
Téynia péya né, hewe ra ki amay

Verde kişti ağay, begi, xozonay
Berdi, kişti; dıma iyé sare u pay
Ser ra guret, va ard ve ro çınay
Taé lüy u kuzu werdi, taé vésnay

Taé şi kewti eskeftu, kou ro remay
Céni, çéney ağwe berdi, viyarnay

Ma u pi, eve ho dest ra xeneknay
Domané ke wésaniye ver bervay

Dımera ray cériyay, bombey erjay
Cor de adır u kıle Désımu ro vornay
Eskeftu de eve düy ve ağuy xeneknay
Domané vırare, néwes u kokımé héştay