AĞAYÊ MA

-*-
Qe coru qolay niya, ağaéni
Tım kar u baré ho ré hawuréni
Derd u khul u xem ra xeverdaréni
Hemhal u hemdeméni, hemfıkréni


Çerxi cérené tım na der u dora
Mıxeneti vérené, tım yé hora
Zerre de, tévera, yé sıma zora
Dina, bexté ma ré verdera korra


Vizéri, meste, ağayé herroji
Haydaré yé ho, pesew u peroji
Koti beno, qe zımey, qe veroji
Kam beno bıvo, bémırod, béroji


Gerre nébeno, qeder u taliyo
Béxevero, kam kokra nébeliyo
Cané sıma ra kerganu gıliyo
Qederé gula reze tım teliyo


Roza hirae, ve çéf u heduri
Roza ke lozım bené, kuné duri
Dest u pay béréra ver, çıme suri
Eskera, dızdiye; bené quduri


Hal u demé qomi sıma zonené
Qomi werte de xelefi tım bené
Yé hora, xanedani névérené
Ho zonay ancax ağaéni kené

Torné Thuji-2007-2009

PAYiZO MEKTEVİ BENÊ RA

Ma u piyé, domanu ré rüyé ho dané
Dina sero kami ra ke, ma u pi vané
Werd u nun, koti bıvo, soné cıré ané
Vésan vındené, domonu ré verdané


Domoni ke bi pil, é ki yé horé kené
Çı ke, ma u pi dine verde nıka wené
Ê ki nayinu domanuné ho ra vénené
Khalık u piriki na hal rındek zonené


Qe coru nébiya ke, bé derd u bédewa
Qarr werdene, her zometi ho ré rewa
Cıro vozené; qe perrozo, qe pesewa
Ma u piyéni ramina, eve na hewa


Domoni ke bi pil, é ki yé ho ré kené
Qanuné weşiyé, isoni néwurnené
Serva domonu teng u xırave vénené
Bé domanu, çéyi hosero némanené


Kam beno bıvo, ho dımera az wazeno
Domoni zoné ho bızoné, qom maneno
Bé zoné ho vé, kes ma u pi say nébeno
Qa coka, mordem zometu ré raji beno


Payizo mektevi her ca newe ra bené
Yé dina ollemi, zoné ma u pi zonené
Hem zonené, hem mektevu de wanené
Xora yé ma, zoné ma ra morım manené

Torné Thuji

QESECAY U EDATi

--*--
- 3. HiREYÊNE

-*- veraver = boyna vera jubini = paralel

-*- seraser = sero ju ra hata sero bin = baştan başa, bir ucdan bir uca

-*- pésero = jubini// zuvini sero = üst üste

-*- tébın de = jubini// zuvini bın de = alt alta

-*- téverver de = jubini// zuvini verver de = yan yana
-*- téver de = jubini// zuvini ver de = yan yana

-*- tédıma = jubini// zuvini sero = arka arkaya

-*- tédıme ra = jubini// zuvini dıme ra = arka arkaya

-*- téserutébın de = jubini// zuvini ser u bın de = alt, üst halde




2. DiYiNE
-*-
-*- téwerte = werté jubini// zuvini : karışık
-*- téwerte ra = werté jubini// zuvini ra : karışık duruma gelme

-*- témiyan = jubini//zuvini miyan : karışık durum
-*- témiyan ra = jubini//zuvini miyan ra : karışık duruma gelme


-*- tézere = zerré jubini// zuvini : içiçe
-*- tézere ra = jubini// zuvini zerre ra : içiçe duruma gelme
-*- tézere de = zerré jubini// zuvini de : içiçe durumda olma


-*- télewe = lewé jubini// zuvini : ya yana
-*- télewe ra = jubini// zuvini lewe ra : yan yana durumdan
-*- télewe ra = lewé jubini//zuvini ra : yan yana durumdan

-*- télewe de = lewé jubini// zuvini de : yan yana durumda(bir arada)


-*- tésero = jubini// zuvini sero : bir birinin üzerine
-*- téser de = jubini// zuvini ser de : bir birinin üzerinden
-*- téser-tébın de = jubini//zuvini ser u bın de de : bir birinin üstünden-altından






1.VIRÊNE

*-
Form: 1
.na dere ro şiye (voro)... niya voro şiye (voro)…
. na voro şiye…(voro) ... naza ro şiye (voro)….

Form: 2
.. na dere de şiye (vorde)… na vorde şiye (vorde)…
.. corde amé, vorde şiye (vorde)...

Form : 3
. na rae ra şiye (vırade)… na vırade ra şiye (vırade)...
. naza ra şiye(vırade)... uza ra amé, naza ra şiye(vırade)

Torné Thuji

TAYÊ VANÊ MA...

-*-
De taé vané, ma verde ra tırkime
Qa ma ede werté asya ra ameyme
Dı aşiré tırkuyime, nazara nime
Ma nazaura, na zoné ho mısayme


Kes névano, rozé cıra bıperşime -/-
Na zoné ho, ma kami ra mısayime
Çond sey serre de hundé zédyayime
Kiştime, qır kerdime, néqedyayme


Taé vané, eslé hora ma kurdime
Nara ravér xélé cau ra vérdime
Ma péyé coy na hetu ser ameyme
De ma naza na zoné ho mısayme


Néame aqıl ke, rozé cıra bıperşime -/-
Na zoné qomé ho, ma kami ra mısayme
Serva sari merdime, hem surgın bime
Uncia ki zédyayme, coru néqedyayme


Taé vérdaé, pi u khalikuné ho ra
Pirik u khalıki diyé, ede çholu ra
Wayiré seceruné, moré mamuru ra
Kelé ho bırnené r ısm u heykelu ra


Néame aqıl ke, rozé cıra bıperşime -/-
Ni zoné qomé ho, ma kami ra mısayme
No zon yé kamiyo, ma ke wayir nime
Ya ki; kokbırré wayıruné ni zonime


Maé ke eslé ho ra nazawu ra ime
Zerré thirakuné dinu ro sér kerime
Çı ke uza de, ma yé hora bıvénime
Werté dıdonu ra vajime, rü sanime


Ison vera nine, derdu ré wayir beno
Cı ro se bıkero, se vazo, nézoneno
Torné Thuji mesta ma ré merax keno
Kam; kami, ho ré laz u çéna véneno

-*-*-
Qa yé dinédine périne ra ki zora
Moré ke sero, eve namé dısmenu ra

Torné Thuji

ADIRÊ SARİ VORENO MA RO

-*-

Sımayé ma, çıra qe hora pers nékené
Yê sıma çıka? Sıma ho ré çı wazenê
Rasta ho nézonené, tım sari ré mırené
Ma çıra, coru derdé horé nébervené


Yé ho nénusnené, cıra duri manené
Soné, ero yé sari feteliné, vénené
Ané, vera çımuné qomi dardekené
Serva rasta sari, ma qéy zuvini wené


Heqeretuné sari vénené, pırkené
Plan u programuné sari gore vozené
Zé vatena sari rae ra soné, yéne
Horé ki plan u programu névırazené


Çı ke yé mao, cıra veré ho çarnené
Hemegé yé mayéma béwahir manené
Yé ma werte de bené vini, névénené
Maqa cokao ke, rasta ho némısené


Yé ma ve çı zometu cau ra vezené
Çıke yé mao, maré lozımo, vénené
Hem dané aré, périne céné, nusnené
Hem na pelguné ğeyali ra darde kené


Taé ki soné, sari ré xızmete kené
Cokurao ke, qamçu yé sari péwené
Fırsendo ke kuno ra dest éy ki remnené
Cokao ke, rasta ho hona nézonené


Taé serva zon u qomé ma dané horo
Yé taine derdé ho, boyna der u doro
Qawxa sari de, adır welaté ma ro voro
Torné Thuji vano, no sené qanun u toro


Torné Thuji

KUTIKÊ SARİ

-*-
Kutıké sari, kayé desté zalımané
İyé ke xızmeta sari de niadané
Désımu dinu ra “kutıké sari” vané
Mordem say nékené, qimet cı nédané

Ağayé ho ki, coru qimet cı nédané

Ha kutıké sari, ha milis name pırané
Kutıké sari, qimeté weşiye nézané
Heqo!!! Eve kutıkuné sari memané
İyé ke Désım raé, ho ra désımız vané


Se serre lop buro ki, qa kutık kutıko
Lopo ke, ağay dané cı, cıré qotıko
Mordemu né, dinu çımde ki ju pırtıko
Rama heqi névajina, bara ho kertıko


Kutıké sari tüya mordemuné ho beno
Qa hundé ke mordemuné ho ro loweno
Yé déy ju sopa, coru meste nézoneno
Xoser né beno, qa o sari cor véneno


Kam çhéro, omré ho de ju rae mıreno
Xain çıqa ke can nédano, herroz unceno
Tiji ver erzé ki, tım şiye de maneno
Vaz nébo, era ho néno, coru ho beno


Çıqa ke, ve persé sari, ero ho keno
Xain téniya né, azé azé ho ki unceno
Az, çıqa ke bé guna maa hora beno
Şiayé pi u khalıki, tımutım fetelneno

Torné Thuji
MORDEM JU RAE MIRENO, XAiN HERROZ

YA TiYA, YA ÇiYÊ NiYA -4-

-*-

Héy xafıl! Ya tiya, ya ki tı çiyé niya
Zıvıl bile niya, bınde ke nuxta çiné viya
Mordem saybena, xoré ke wayir véjiya
Kami rasta ho nusna, qesa ho vajiya


Eke yé ho né, saré pésey sero saybiya
Sayke, tı na dina olemi vira ki şiya
Paga pi u khalıkuné ho ki xıraviya
Kam yé ho né, namé sari ré wayir véjiya


Qesa mordemi her tım zonina, hem vajina
Eke mordemi het ra, rasta ho tım nusnina
Qa rasta mordemi ke nusniye, tım zonina
Rasta mordemi ke zoniyé, yé qomi périna


Kes esto, qa hundayé ke weno, sımeno
Çé ho de sarira xırav vano, mılqi keno
Zoné ho ra, lawuk u sanıke vatene nézoneno
Dina de, o keşi het ra mordem saynébeno


Mordemo zé mordemi, yé ho ki nusneno
Sanıke, lawuke, mesele çı ke besekeno
Téniya yé sari né, tarixé ho ji zoneno
Lawukuné ho mevazo, mordem nébeno


Mordemo zé mordemi qa tım tım waneno
Wahiré nusi qe péra hora, qe pése beno
İlim u irfan cıra cérino, kam ke zoneno
Fıkr u zıkro rast u xér, mordem niya mıseno


Qa Torné Thuji tımutım yé ho nusneno
Ténia nénusneno, çı ke nusno, waneno
Ju ke yé ho ra qéri, çı koti véneno
Waneno, kam ke qimeté ilmi zoneno


*Bir kişiye hizmet eden, onu onurlandırır.
-Bir dile hizmet eden, bir halkı onurlandırır.*

Torné Thuji

VENGA PiRU DANÊ

-*-

Çıqa ke venga piru, rayveru dané
Memuré ma vé, peru dame cı, vané
Yé ma, bé jiar u diyaru memané
Rae ra véjiné, iyé ke ve dine qané


Çı wext ra, kami dest ra berati
Qa bızonime, secereyi kéy veti
Se ninu gureti ho dest çor heti
Pi u laji tédıma, wayiré qısmeti


Hata ewro yé ma çıqa ke ax u zaro
Dina olem zono, yé mayéma iqraro
Kes mevazo ke no jü het ra qeraro
Qewl u qeraré pir u tolıvi piyaro


Névo piri vazé, no ma ré karo
Rast ke mezoné, rae ré zeraro
Kam ke ğeletino, caé ho daro
Rae ra erjino, kam cıra bézaro


Cıra ke bé xevero, qe nézoneno
Raa haqi ne muso, ne ki waneno
Derdé ho pere, pul; boyna wazeno
Ho keşi mesoyno, o pir nébeno


Torné Thuji dest de her tım miyazo
Kes, pir nébeno, tolıv ke mewazo
Mevazé ke yé ma cümbüş u sazo
Sema, beyit, deyiş, dém u duwazo




*Keşi ra né vame mara, ya saro

AX DE BIRA BIRA

Ax de bıra bıra, bıra goniya mına tıra
Ma ez, hundé danu ve horo, vanu bıra
Tı; ne vénena, ne gos nana ro mı, çıra
Ma bıra! Qéy bé xevera, tı qesa mıra


Zoné to; ro u cané to, qéy cıra tı vérda
Toré meste-bürro çino, wesawes merda
Bé zoné ho ke menda, tı pelga de zerda
Pelga zerde, vayi coru dare ra néverda


To néréynena, xızmeta ke sari ré kerda
Qa xızmeta sari, tım ağwa deru berda
Mevaze ke bé zoné ho, tı keşi ré derda
Azo zon zonağ ke, to ho dıma néverda


Na dina de qomo ke, zon cıra cériyo
Wesaves merdeo, bé ro u bé can biyo
Bé zoné ho, qéçi vazé, wayiré textiyo
Meste-bürro cıré çino, hora ke vérdiyo



Torné Thuji dano saré horo, hem vano
Mordem ni béteru, se ede ho serde ano
Riyé dina de qom bé zoné ho bımano
Çévésao ke cor, cavé na qesa se dano



- 12.09.2008
*Keşi néréynena xızmeta sari*

TI NUSNENA, EZ UNCENU

Unca bive téra, hemi ki zédiyayi
Derduné mı ver tomoré mı unciyayi
Zerri, pısıke; mı zerre de kerkeşyayi
Dest u paé mı péro piya recefiyayi

Zerré mı beno teng, tım kelacér benu
Tı mı çare ra nusnena, derdu ez wenu
Derdu tı kena téra, qaru ez uncenu
Hona ki to ra dest nékenu, névérenu

Ez coru, xıravé da keşi névazenu
Saré kami tengede vo, ez dest erzenu
Senéni bené bıvé, cıré xére kenu
Ma ez na éjat u şésatu qéy vénenu

Sar ma ré kerdo bela, eve inatuno
Persé tora wahiré hukm u hukmatuno
Destde, ma héşir, wahiré zor u zextuno
Ma çéveru verde, sar é seré textuno

Çévésae, bara maré, sené ğezevo
Hiré hozar serri dem ma péy de vo
Wayiré derdu keré, hasaré ho mevo
Derd ro qomé nişo, derman cıré çinevo

Na dina made, xırav wayiré qesuno
Desturé to, zulumkar dısmené zonuno
Heqo zé to wayiré derd u dermanuno
Qéy Torné Thuji liyaqé bıné destuno

Torné Thuj

*Seveno! derd ro to nişo, dermané ho çinevo.*

MA VE XÊR Di

Mordem ke jubinira, mavexérdi, vazo
Çin, xusumet u buxuz péro derbazo
Qa merebayé mordemi cıré zé duwazo
Bé mereba, zerre néweso, pıré marazo


Mereba, mordem ré sevevé naskerdene
Zerro wes u vengo şirén ra slam daene
Thowa çino, zé desté jubini guretene
Weşiye ramıtena. Sevev niya werdene


Ez ve mordemiye, vengé sıma hesnenu
Ez welaté ho, cao ke büne ğéyalnenu
Ma ez naza qom u lézımuné ho vénenu
Qomi ré wayir, goni ağwe néerzenu


Çiçegé tırr u kasuné mayé rengınu
Maré thomé ağwa héyniyuné serdınu
Rengé dar u beré ma yé verın pelgınu
Ma se ho vira keme, kouné çengelınu


Kam ke, ver heté welati rao ke, béro
Tım caé ho çımu sero, va ravér şéro
Qomo! Ma ré kam ke newaz u béxéro
Xızır, va hona ke rewo, ma ra bicéro


Torné Thuji, dayma herkeşi mereva ke

Tım ve zon u zerro wes ra isonu sake

Eve qesa wese, çéveré zerri rake
Se ke khalıké to, her tım sıma ra va ke

Torné Thuji