DERSIM-38 (3) / MIZ U DUMAN Vi

*

Hewré şiayi bivi kom, néşiyéne
Mız, duman kou serde erjiyéne
Dewi, waréyi némendi, rıjiyéne
Wesu né, quté merdu qırfiyéne


Keşi nézonéne cıro se kené
Périne téy bené piya qırkené
Cendegu wergi, lü, kuzeyi wené
A roze kutıki hard ra goni lésené


Kam ke çımé ho cıro bırnéne
İyé binu ra bırné ra, berdéne
Hata ke lıngu ser fişti, kuyéne
Tainé ki, uza néne pıra kişténe


Wes ki serde kerdé, riyé ho dırné
Vato néverdané ne az, ne qırné
Roze amé, qırkerdene cébırné
Nézona ke, çıra xuya ho vurné


Béaqıl, béhés, béxud mendivi qom
Téserra nas nébi, qe baqıl, qe bom
Kesi qe toway ra nékerdéne lom
Nayé ke mendi vi ki, kerdivi kom


Qom éndi va mewazo béçaréni
Juvini ré ke yar biyéne vıréni
Çirr kerdéne kefené yé rozéni
Welat ra pernéne cor u céréni


Qırne : nesil, kesim
qırné : nesilleri, (Mecazi: aşırı gösterişli, hoppa)

Torné Thuji

NA RINDEKiE KOTİ RA

* 

A RINDEKÉNİ

*:
Tı ve a rındekéni, tédine ra cor a
Koti viya, eve na rındekéniya ho ra
Bezne derg, buri tenıki, motemor a
Zerri ra beşti yu, ez ede sowda to ra

Dıdoni mırzané, lewi tenık u sur é
Çévesay, bıhuyiye, sabine, ez ho ré
Gosé mı kherr, çımé mı bé to korr é
Roz ra çond geyimi mırenu ez, to ré

Xatıro gıran o, lewé ma o dest ra
Olli ré sıkır kenune ke! a mae esta
Zéde mevone ki, dae dest ra tı resta
Şirénéniya to ki, rocveroc tayna hesta

Dewa sıma verra sona tırri u kare
Eke béri dewa sıma, çı yéno mı sare
Desté mın u to, kéy ke améy ve téaré
To ho ré remnenu benu vere koy ware

Tı qe merax meke, ware de çı werino
Kelpuği, héluge, sıng u rıvés hao vejino
Moresınci, s a v ı l e, şirik dıme ra jédino
Dırıke, şilani, her tım té dıma çiyé vénino

Bé era rame, ez, bé to qe nébenu
Ez; zerré çımuné to de ho vénenu
Na hardi sero, ho ré qe ca néwazenu
Bé to, ma ez ca u ware pé se kenu

Torné Thuji

YÊNO ÇiNENO-WE BENO

-*-

Bıra bıra tı diyağé zerré ma bıra
Ma yé to, na lerza to maré çıra
Qom urzeno ra pay, tı vérda tıra
Qéy cıra bé xever u bé xatıra


Ma huneré zuvini newe divi
Newe haydar u hawuré ho bivi
Qesé huyé peyeni ma névativi
Çı ma ré ğelet vi, çı ke rast şivi


Dewé da xıraviye ré wayiriye
Nébena bé server u serdariye
Na dawa ma, dawa gırane viye
Ramina ve hawur u haydariye


Çıqa ke na ve ma béxever biye
Qe néwazené şiya békeşiye
Xort u ozevi kené wayiriye
Çı héf ke to ve ho çhım nédiye


Bıra! no felek ma ra çı wazeno
Qéy tım vıréniye ro ma bırneno
Çévésae yéno, çineno we, beno
Destu keno verra, zerru vésneno


Az u rez u zanu rındek zoneno
No çévésae ma ré zéde véneno
Sorruné ma sero adır vésneno
Zerre vıloşino, vıle çewt maneno


Ma zuvini ré xal u werezayi
Heté ra dedeçéney u derezayi
Taé zof rew şi, cigeri vésnayi
Qomé ma ré nalini caverdayi
Torné Thuji

DERDÊ MA HALÊ MA

*
Da da! hala béré na derdé ma, halé ma
Derudor maré bar, rast nébeno vılé ma
Çıra kewté ra téaré, ma ni havalé ma
De unca kerdive téra, derd u khulé ma


Yéma taé dané ho ro, vané malé ma
Serva mali qırkerdi domon u khalé ma
Qa gureti qender ve astır u çualé ma
Cokura vi, ma dest de némend dalé ma


Taé vané rasto, hora aqıl u fıkré ma
Herkes bızono yéma, bımıso zıkré ma
Baqılo, kam ke ho nano ro çığıré ma
Zengın lozım niyo, beso feqiré ma


Taé yéné vané, her çi serva diné ma
Lao serva dini kişiyayi çond vıréné ma
Çirr kerdi, némend tumon u pıréné ma
Bırr, tırr u kasu ra vérdi ra bırené ma


Duri vındeno, qomé ho cıra mevéro
Werté nékuno, va hérsé dine wevéro
Ma péyde tarixé mıxenetiyo no péro
Qa cokura o ke sar cor, qomé ma céro


Sıma ve heq kené, ni raşti dané péro
Rındek pérodé, hérsé dinu qa provéro
Zerré ho ra tever keré, va véjiyo şéro
Xevere cıdé Torné Thuji va hona béro

_ MUZUR ÇISMÊ RO U CANi _

Ollem bızono Désımız se vano
Muzır, Désımu ré eve çı mano
Désımız vano, Muzır ro u cano
No qesé khalıkune ma, zof khano
-*-

Dina de eve name u vengiyo
Ko u çısme u çhemé ho jargiyo
Héyniyé Muzıri hewsé dergiyo
İtıqaté ma de kemeré çengiyo


Muzır, Désım ré çısmé ro u cano
Desımız niya zono, niya ki vano
Eve çımo ğelet, pıro nianédano
Cıré wayir vo ke Muzır bımano


Vora ke zımıstanı kou ro vorena
Hata omnani kou serro manena
V ıloşina ro, cerdu ra rézena
Resena pé, çırtanu de belbena


Kouné Désımi ro qa vore bıvoro
Ağwa heyniyu mevındo, bıgurro
Ro u can, ko u çhemi ra Muzıro
Ta era ho do, va Désim memıro


Ewro vıle çewto, qom béheduro
Désımız ke, dawa Muzıri ra duro
Bara azé Désımi ré, her çi zuro
Ağwe némanena ke, gepé buro


Veréniye ro çhemu gıré dano
Nafaé Désım de koka her çi ano
Tepısé ağwe, Désim ré fermano
Bé dae ke! Kou ra wele memano


Torné Thuji

HONA KE HARD U HEWA NÊMERDO

-*-
Caé pi u khalıkuné ke, tırr u kaşi
Hona é tırru ra esté, dar u vaşi
Cıré wayiro, kam ke tede rae ra şi
Bé hard bené xam, caé ho de, xaşi


Sari qerari dé, ma pro sér kerdo
Sené aqılo, ma hardé ho caverdo
Hard u ağwe u hewa ke némerdo
Caé weşiyo, çıqa ke çele de serdo


Düey bıkeré ke zof çi névırajiyo
Koti kerdo béton, dest ra véjiyo
Sa vime ke hard qılérın nébiyo
Hard zengıno, çıqa ke nézoniyo


Ollem zono, yé ma tır u bendıno
Kemer u kuçé hardé ma rengıno
Qom qey welat u zoné ra vérdıno
Haur ki niyo, hard çıqa zengıno


De her ca ison rameno weşiye
Heq zoneno, weşiye ke zoniye
Qe keşi de néramina dısmeniye
Werté ho de cé mebırné lézımiye


Televizyon u kompüturi véjiyé
Jubini ra xeverdar u baqıliyé
Theyr u thur u her çiré olvojiyé
Qimet ke da hard u ağwe, isoniyé

Torné Thuji

DÊSIM BÊ MUZIRi NÊBENO

-*-
Kouné kemer u çağılınu de rezena
Eskewtuné bıné hardi de ki vındena
Zé sıté sıpeyi, Ağwa Muzıri belbena
Kef u kopır, ede ho ser de erzena


Vora kou zımıstani pésero nijina
Tan u tiji ke vénena vore vıloşina
Sona goluné bıné hardi de oroşina
Bena çewres çıme héyni, héni véjina


İtıqaté ma désımu de jiarge zonina
Çéfé ho wast, ta dana ro ho çerexina
Ca cade verté dew u suku de vénina
Ge békes, gosé ho rehet, gran gran uncina


Dormé Çhemuné ma, tıvana ceneto
Çhemiyé ke; Désım, désımu ré welato
Çéwesae! sené dısmeno, to tede veto
De! heté ra ki wayiré text u dewleto


Welaté mırcolık u mor u mılaununo
Taé theyr u thuri ré xané seré rauno
Hem ki, vırara maa surbelek mosuno
Wayiré dar u ber u sung u rıvésuno


Dormé ho nos u neqsé desté wayiri
Hesreta cıré, désımız ke kuno duri
Hundé ke bıgurro ağwa Çhemé Muzıri
Désımız ki wayiré huzur u heduri

Torné Thuji

MA VE XÊR Di

Mordem ke jubinira, mavexérdi, vazo
Çin, xusumet u buxuz péro derbazo
Qa merebayé mordemi cıré zé duwazo
Bé mereba, zerre néweso, pıré marazo


Mereba, mordem ré sevevé naskerdene
Zerro wes u vengo şirén ra slam daene
Thowa çino, zé desté jubini guretene
Weşiye ramıtena. Sevev niya werdene


Ez ve mordemiye, vengé sıma hesnenu
Ez welaté ho, cao ke büne ğéyalnenu
Ma ez naza qom u lézımuné ho vénenu
Qomi ré wayir, goni ağwe néerzenu


Çiçegé tırr u kasuné mayé rengınu
Maré thomé ağwa héyniyuné serdınu
Rengé dar u beré ma yé verın pelgınu
Ma se ho vira keme, kouné çengelınu


Kam ke, ver heté welati rao ke, béro
Tım caé ho çımu sero, va ravér şéro
Qomo! Ma ré kam ke newaz u béxéro
Xızır, va hona ke rewo, ma ra bicéro


Torné Thuji, dayma herkeşi mereva ke

Tım ve zon u zerro wes ra isonu sake

Eve qesa wese, çéveré zerri rake
Se ke khalıké to, her tım sıma ra va ke

Torné Thuji